اصحابى كالنجوم بايّهم اقتديتم اهتديتم ما صدق لرى اولان اصحاب كرامى مقتديان طريق هدايت ايدوب . اول هاديان دين مشاعل دين متين ايله سنن دين مبينى روشن و ازهار آثار حسنه و انوار اطوار مستحسنه لريله رياض شرع مستبينى نمودار گلشن ايتمشلر در ، خصوصا اصحاب صفا انتساب ، يارغار حبيب رب الارباب بزرگوار عالى مقدار جميل الاثار مظهر
ثانِيَ اثْنَيْنِ إِذْ هُما فِي الْغارِ
« 1 » راه هجرتده خير رفيق خلوت و جلوتده مونس و هم طريق صديق جليل القدر باهر التصديق ، جناب ابى - بكر الصديق ( رض ) ، و اعدل اجلهء اصحاب و اكمل ادلهء شاهراه اجر و ثواب ، زينت افزاى منبر و محراب ، رهنماى طريق صدق و صواب ، اعنى جناب عمر بن الخطاب ( رض ) و جامع آيات قرآن ، صاحب انوار حيا و ايمان ، صفهء اصحاب صفايه زينت و زين و ثالث شيخين « 2 » ، اولان جناب عثمان ذى النورين ( رض ) و امام هدى پيشواى صف اهتدا ، رافع علم رسول خدا ، مظهر انا مدينة العلم و على بابها ، زوج بتول ، ابن عم رسول ، صاحب محاسن و مناقب ، جناب على بن ابى طالب ( رض ) حضراتيكه بيت معمور دينه چار اركان و سقف خانهء شرع گزينى كتورمكه هربرى عماد قوى البنيان در خلافت باهره و كرامت ظاهره مسندنده ارادهء طريقه فاخرهء دنيا و آخرت ايليوب مظهر اجور زاهره و مصدر فيوض وافره اولمشلردر
اما بعد عالى حضرت كيوان رتبت برجيس منزلت بهرام صولت خورشيد طلعت ، ناهيد عشرت عطارد فطنت قمر فطرت ، دولت اساس سعادت اقتباس ، عزت استيناس حشمت لباس ، شاه عباس ، دام فى هداية رب الناس ، محضرينك مخبرينه لباس مهر و وفا ايله ملبس و اساس صدق و صفا ايله مؤسس حد و قياس دن بيرون و مقياس افكار و حواس دن افزون سلام سلامت نماى پادشاهانه و پيام مودت فزاى شهنشاهانه اهداسى و انجذاب خاطر عاطر سلطانى و توجه ظاهر و باطن فيض مآثر
هامش
( 1 ) - سورة التوبة 40 .
( 2 ) - منظور از شيخين ابو بكر است و عمر ، نخستين و دومين نفر از خلفاى راشدين .