و قلمروان تورانه سفر ايلملرينه بادى و سالك مسالك اعادى اولمشيدى خلعت خلافت جناب عزت مآبكزله مباهى اولدقده اعمال عقل و ادراك و اجالهء شعلهء جوالهء ذهن دراك ايله ينه اسكى راهى مسلك و كزلك مجرهء حسن تدبير ايله صكوك صلح غير مشكوك دن نقطهء شكوكى حك ايدوب و شعار صلح و صلاح سابق و دثار فوز و فلاح لايق ايله ارتدايه اهتدا و نداى مسرت فزاى
الصُّلْحُ خَيْرٌ
« 1 » . خبرينى اصغا قيلوب قرع باب صلح و صلاح و ترتيب مقدمات فلاح و نجاح ايچون نامهء نامى مصالحت عنوان و فرزند ارجمند نجابت نشانكزى آستان راستان نواز مزه ارسال و زناد و دادى ايقاد ايله آتش محبتى اشتعال ايليوب عهد و پيمان و حلف و ايمان ايله مجددا فتح باب مصالحه و سد سوارخ مكاوحه ايله تشييد مبانى و داد و تمهيد قواعد اتّحاد اولنوب اسلوب سابق اوزره مهم قديم و كار قويم و نتيجهء بهيجهء صراط مستقيم اولان غزاى سابقه بوطرفدن عزايم لايقه اولنوب كفار بدكردارك نيجه متين و استوار قلعه و حصارلرى و حصون مصونه ايله مشحون اولان بلاد نامدارلرى ملحق ديار بهجت آثار عثمانيان عالىشان اولمغه باشليوب عهد خلافت عهدهء سلطانيه مزه كيروب برات خداداد سلطنت مز
إِنَّا جَعَلْناكَ خَلِيفَةً فِي الْأَرْضِ
« 2 » مشكاتندن مقتبس اولان انوار خلافت عنوانى ايله قرين لطف بارى و اقاليم عالمده بالطول و العرض امر مزجارى اولدقده مجارى عادات قديمه اوزره ولايت نمچه « 3 » و مجار فجّار تسخير مسالكه جرى اولوب آيين گزين آباء و اجداد مز احياسى مظهر ضمير صفا انتما مزاولمشيكن منشيان نامهء شاهى اولان بعض فحّاشك سوء تدبيرندن ناشى حال ظهور ايدوب بىسبب نقض عهد ديرينه ميل و سلسلهء عهود ده معقود اولان قواعد نقضه تشمير ذيل « 4 » اولنوب ترك الفت و سلوك راه خلاف و
هامش
( 1 ) - سورة النساء 128 .
( 2 ) - سورة ص 26 .
( 3 ) - منظور از ولايت نمچه كشور اطريش است .
( 4 ) - تشمير ذيل به معناى دامن برچيدن . تشمير در لغت به معناى خراميدن و كوشيدن و سرعت نمودن است . شمر الثوب برداشت جامه را ( منتهى الارب ) .