لطف اون جانه خدا هسّه كه در درياى علم * هم كه كشتى هم كه لنگر هم كه بندر هسّمه
دين پاك مصطفى ره به علىّ مرتضى * هم سپاه و هم سلاح و هم كه سنگر هسّمه
نصف شو كه پرسمه گيرمه وضو خومّه نماز * كمّه چى پروازها با اين كه بىپر هسّمه
شو كه بيّه شوپر هرور خوانه شونه پرزنون * جانه آمي من مگر كمتر ز شوپر هسّمه
خوانى از سرّ حسن سر در به يارى دون كه من * بنده فرمونبر آل پيمبر هسّمه
19 / 4 / 1350
متاع عشق چى بازار داينه * خريدارون بىآزار داينه
خريدارى چو بابا طاهر لر * خريدارى چون من در لار دينه
آخر صفر 1389 ه ق
« بوين چهها ، بوين چهها »
به روز و شو حضور دار بوين چهها بوين چهها * شه دلّه سوى نور دار بوين چهها بوين چهها
اتي مه حرفه گوش دار اتي شه جا سروش دار * هراس مرگ و گور دار بوين چهها بوين چهها
هميشه ذكر يار دار زبون و گوشّه خوار دار * دو چشّه مثل كور دار بوين چهها بوين چهها
پرت و پلا نأونأو چون و چرا نأونأو * نه زرّه دار نه زور دار بوين چهها بوين چهها
بأؤ خدا خدا خدا تو پادشاه و من گدا * مره به عشق و شور دار بوين چهها بوين چهها