بناء على هذا ، اشبو عهدنامهء همايون مز موجبنجه عمل اولنوب ما بينده خصومت و مخالفت بالكليه بر طرف و خورشيد درخشان مهر و الفت داخل بيت شرف اولوب . جميع امور مصالحه ده بو عهد نامهء صدق مشحون مز دستور العمل و مأخذ هر مجمل و مفصل اولوب . شرايط و لوازم معاهدهيى بتمامها ابقا و استيفا و مبناى صلح قرار داده اوله دخى شروط و عهود مزك زبده و عمده سى بو در كه مقدما آبا و اجداد عظام مز انار اللّه براهينهم عهدنامه لرنده قيد و شرط اولنديغى اوزره سلك ملكلرينه داخل اولان مملكت لرده حاشا من السّامعين سب شيخين و لعن ذى النّورين و قذف و طعن زوجهء مطهرهء حضرت رسول الثقلين ترك و منع اولنوب و ساير راويان احاديث خاتم النبيين و حاميان حماى دين مبين اولان اصحاب گزين و ائمهء مجتهدين ( رض ) حضرت لريكه هربرى مقتداى دين متين و والى ملك يقين در لر تير طعن اصحاب تبرايه هدف و برو جانبدن تجارت طريقيله اول دياره وارنلر بو مقوله كلمات ايله معذّب و مكلف قلنميه تا كه جناب جلالت مآب مز طرفندن دخى بو صلح ميمنت مقرون محافظه و مراعاتنده گون بگون توجه همايون - مز افزون و مدى الايام و الليالى خلل و نقصان دن مأمون و مصون اولوب .
ايام دولت خاندان ابد اتّصال و زمان خلافت دودمان عدالت اشتمال مزده مؤبد و برقرار و مشيد و استوار اوله باذن اللّه تعالى و بحرمة نبيه المجتبى و آله و اولاده و اصحابه النجبا تحريرا فى تاسع عشر من شوال لسنة ثمان و عشرين و الف . « 1 »
هامش
( 1 ) - منشآت فريدون بيك ج 2 ص 265 - 262