لرده رعاياى طرفينده كمال اطمينان و ممالك جانبينده نهايت امن و امان مقرر ايدى بعده چشم زخم زمانهء غدّار و مكر و كيد روزگار ايله اول صلح قرار داده خلل - پذير و بر هم زده اولمغله فقراى رعايا كه ودايع خالق البرايا درآمد شد عساكر بىپايان ايله پريشان و مرآت كائنات ده آثار و علايم رديه نمايان اولمشيدى .
الحمد للّه تعالى بوايام ميمنت انجام ده جلوس همايون اخبارى مسموع جهانيان اولمغله احوال كائنات مجددا انتظامه يوز طوتوب . جناب فياض ازل ميان طرفينده اولان عقدهء كدورتى حلّ و كدر خصومتى صفاى محبته مبدل ايدوب جمعيت و هجوم لشكر عثمانيان تفرقه انداز فرقهء اختلال زمان و كوس آسايش اسلاميان مژده رسانگوش عالميان اولدقده الطاف خفيهء قادر مختار « الجماعة رحمة » سرّينى آشكار و نقش پرداز صحيفهء روزگار
الصُّلْحُ خَيْرٌ
« 1 » نقشنى رسم زمين كارزار ايدوب .
ميان عساكر جانبينده شمشير خلاف در غلاف و ارباب جنگ و مصاف بربريله - سينه صاف اولدقلرى جهت دن اجماع تامّ و اتفاق وزراى عظام ايله عقد مصالحه يه مباشرت و ترك جدال و خصومت قيلنوب توفيق و هدايت خالق الكونين ايله اصلاح ذات البين ميسّر و مقصود رعاياى طرفين آيينهء حصول ده جلوهگر اولوب . مابينده اولان تناقض و تباين جزئى بالكليه محو و معدوم و حجت صحيحهء صلح و صلاح مهر قبول طرفين ايله مختوم قيلندى .
فلهذا شكرا على تلك النعماء دوستلق و محبت پيامنى انبا و تهنيت جلوس همايون خدمتنى اداايتمك ايچون سالف الذكر يادگار على سلطان خلفا روانهء سدهء سپهر آسا قيلنمشدر . اتمام لوازم رسالت و تكميل مراسم خدمت ايتدكه نصكره بروجانبه انصرافنه اذن و رخصتلرى ملحوظ در ديوانها و اشارت و دوستلغه متعلق نيجه كلمات ايله اظهار خلوص و محبت و اشعار كمال مودّت اولنمش ايمدى طبع حقشناس خورشيد اقتباس لرينه پوشيدهء لباس التباس اولميه كه سوالف اعوام
هامش
( 1 ) - سورة النساء 128 .