ديو الزام صد دنده اولمشلر بو دولت عليه ايله بو يوزدن معامله صراحة صلحه عدم رضادن عبارت و سدّهء سنيه ايله اولان دو ستلقك قدر و قيمتن بلمامدن كنايت دكلميدر . الخير ما اختاره اللّه حقيقت حاله نظر و تتبّع احوال قضا و قدر اولنسه انسان ضعيفك النده اگر خير و اگر شر برنسنه يوقدر . جمله ازمهء احوال و آثار واعنهء اوضاع و اطوار اول فاعل مختار و مكور الليل و النهارك يد قدرتنه مفوض در .
بيت
جمله تدبير پس پرده ده استاد كدر * اختياريمى صانور سن حركاتن زورك
دائما اول جناب وهاب و درگاه مسبب الاسبابدن تضرع و نيازمز بودركه حبيبى حرمتنه و چهار يار گزين روحانيتنه امت محمده خيرلو و انفع اولان طريق نه ايسه بواضعف عباد اللهى اول سمته دلالت و اول طريقه هدايت قيلوب پس پردهء غيبدن انواع لطف لر و ماوراء تقديردن مأمول اولان مرتبه لردن متجاوز احسان لر ميسر ايدوب . جميع كار و بارمزى رضاى شريفنه موافق و عامهء افعال و گفتار مزى ارادهء ازليه سنه مطابق ايدوب ، نتيجهء كارمز باعث آسايش خاصّ و عام و نهايت اقتدار مز سبب رفاهيت كافهء انام اوله ، بحرمة محمد المصطفى و آله و اولاده و اصحابه المجتبى و السّلام « 1 » .
هامش
( 1 ) - منشآت فريدون بيك ج 2 ص 325 - 323 .