قاصرات الطرف قيلمشلر در .
نظم
اين نامه نيست بلكه پى تحفه باغبان * چيد از چمن بنفشه و پيچيد در سمن
نشكفته غنچهايست چو پيچيده بينمش * همچون دهان غنچه دهانان پر از سخن
اسعد ازمان و ايمن اوان ده اول كتاب بلاغت عنوان فخر الاماثل و الاقران ابراهيم بيك يوز باشى بنده لرى يدندن بومحب خيرخواه لرينه و اصل و شرف وصولندن انواع سرور و شادمانى حاصل اولوب فاتحهء مطلع همايونندن مقطع صفا مقروننه و ارنجه مطالعه اولندقده فحواى بلاغت رهينده ادراج و تضمين بيوريلان نكات رنگين و كلمات سحر آيين حيرت فزاى عقل دوربين و زنگ زداى قلب اخلاص رهين اولدى . ايمدى خاطر آگاه شاهى و دل پر انتباه جهان پناهى يه خفى و پوشيده و مستور و ناديده اولميه كه خاندان مخلّد الاركان عثمانى و دودمان مشيّد البنيان صاحبقرانى جمله سلاطين روى زمينك ملجأ و پناهى و ملاذ و تكيه - گاهى ايدوكى متفق عليه خاص و عام و مسلّم جملهء انام در . اگر ملوك اسلاميهدن فرمانفرماى اولان شاهان جهان و اگر ساير اديان ده صاحب تخت و نگين اولان قياصرهء دوران بودولتك عزت و حرمتنده دائما تك و پوده و رضاى شريف لرين هميشه جست و جو ده اولوب سلف ده جناب سلطنت مآب خلافت انتسابلرينك آباء و اجداد مصادقت معتادلرى دخى بو دولت عليهء ابد پيوند ايله نو جهله دوستلق ايتديكلرى صحيفهء ايامده مسطور و السنهء خواص و عوام ده مذكور در بو سلسلهء عليه ايله دوستلق اساسنه استحكام ويريلنجيه دك نه مرتبه سعى و دقّت ايتديكلرى و برو جانبك رضاسنى نه طريقله كوزتد كلرى معلوم شريفلرى اولديغندن ماعدا بو آستانهء سعادته استناد ثمره سيله كار و بار دولتلرى نه طبقه ده استحكام و رونق و نه درجه ده انتظام و نسق بولديغى بالذات مجرّب لرى اولمشيدى . حال بو منوال اوزره ايكن پادشاه عظيم الشأن و شهنشاه سليمان مكان دوستلقنى كار آسان طوتمق و آخسقه و