بر فرد مداخله ايتميوب عسكر ظفر اثره معاونت اولنوب . اول كفره و فجره اوزرينه فريضهء غزائى اجرايه ممانعت اولنميه محصل بونلر امثالى سلطان سليمان خان زماننده عباد آستانه مز زمره سندن معدود و ممالك محروسه مز حدوديله محدود اولنلر . سايهء استراحت ده مايهء دولت مزله مستظل اولوب حدوده معهوده و ممالك مقصوده آلايش غل و غش دن پاك و سرحد انوار امن و امان ايله تابناك . اوله بواسلوب اوزره قطع حدود و منع صدود ايچون پاشايان سرحددن دستور مكرم حافظ ايالت بغداد اولان محمود پاشا و امير امراء كرام وان ، اولان محمد پاشا ، طرفندن آدم تعيين اولنوب .
هربرى قابل اعتماد اولان ريش سفيدان طرفين قراردادى ايله كمال استقامت اوزره قطع حدود ايدوب . تعيين سنور و تبيين ثغور ايله من بعد شروره مؤدى اولورامورى اول سرحد لردن دور ايده لر و پيام آور مشار اليه حالا عيوب سبّ و تبرا ديار كز - دن مسلوب اولوب . دلخواه و مرغوب پادشاهى اولان طرز خوب موجود اولدوغين افاده قيلدقده فهو المطلوب دينلوب ذمتنه لازم اولان خدمتى حسن آداب ايله مؤدى قيلوب . نوازش پادشاهى و انعام شاهنشاهى له مغتنم و مباهى قيلنوب . مزيد اعطافه مقرون و حسن انصراف له مأذون و انشراح صدر و انعطاف قلب ايله روانه قيلندى .
همواره رهنماى اقبال مادر زاد ايله راهروى شاهراه و داد و پيروى سالكان مسالك حسن اتحاد دائم باد .
لمنشئه
هميشه تا قيلنه آب و خاك و آتش و باد * بقاى خانهء اصلاح دهر ايچون اعداد
اولوب و داد قرين السداد اوى اباد * بو صلحى ايلميه صرصر فتن بر باد « 1 »
هامش
( 1 ) - منشآت فريدون بيك ج 2 ص 261 - 257 .