غريق لجهء انعام و فضل يزدانم * كدام شكر بجاى آورم نمىدانم
لكن حربى كفره و شمشير كش اولان فجره دن ماعدا قديم الايام دن سايهء سعادتمزه مستظل و دائرهء امان مزه داخل اولان اهل ايمانى حمات اوزرى مزه لازم و اصحاب استظهار و استسلامى صيانت ذمّت پادشاهانه متحتم در اول مقوله يه عساكر منصوره مز بوجه من الوجوه تعرّضه تصدّى و مأمور اولمد قلرندن مقدار ذره تجاوز و تعدّى ايتميوب مادام كه علانية كند و طرف لرندن نقض عهد و ميثاقى مشعر بر حالت صدور ايتميه آباء و اجداد عظاممز زمان با امان لرنده ويريلان امان كما كان مقرّ رطوتيلوب حقوق قرب جوار و داعى عهد و قرار اولمقوله لرى اضراردن صرف عنان ايتمشدر . بلطف اللّه تعالى دوستلقى مزدوستلق و عهد مز عهدايد يكى دوستان و دشمنان و كفار و اسلاميان قتنده ثابت و ظاهر اولمشدر . مجملا باب مصالحه ده دهان صدف نشان مزدن صدور ايدن اقرار و اعترافدن بلا سبب شرعى رجوع مز محال و اقسام قسم ايله منعقد اولان عقود عهود مز ناخن غرض نفس ايله انحلال بولمق عديم الاحتمال در بو تقدير لازم التقرير اوزره مادام كه او نه طرفك امرا و حكامندن نقض عهد و ميثاقه بادى و همرنگ اعمال و افعال اعادى بر وضع غريب و نادر صادر اولميه بو طرف دن بر حالت طهور و وقوع بولمق احتمالى يوقدر . بو بابده گماشتگان سر حد منصوره مزدن اولنلره وعيد شديد و تنبيه و تأكيدى مشتمل احكام قضا مصا و فرمان قدر توان مز كوندر لمشدر .
سزاوار دوستى و محبت و لايق يك جهتى و مودّت بودر كه جناب سعادت مآبلرى دخى دائما اول طرفك سرحدحا كملرينه بو منوال اوزره تنبيه و تأكيد اولنه كه دائرهء صلح و صلاح دن بر قدم طشره باصميوب فساد طبيعتدن ناشى اطوار ناهمواردن تحاشى ايليه لرتا كه حدايق مهر و محبته هر طرف دن نسايم حسن اتفاق وزان و رياض و دوالفته هر جانبدن وفا و وفاق آب فشان اولمغله . دائم الاوقات نخل برومند عهد و پيوند بارور و بىگزند و شجرهء صلح و صلاح ميوهدار و برومند اوله باقى .