تخليه سى مشروط و معهود اولان محال و مواضع احوالى دخى قرار ويريلدوكى اوزره اجرا ايتديريلوب قطع سنور و حدود خدمتنه آستانهء سعادت آشياندن تعيين اولنان افتخار الاماجد و الاكارم ، جامع المحامد و المكارم ، سابقا چاوش باشى اولان ابراهيم آغا بنده لرينك معرفتيله بو خدمت خير خاتمته فيصل ويريله و بو جانبدن و اران حكام پادشاهى يه بالدفعات اوامر عليه ايله تنبيه و تاكيد اولنديغى كبى طرف اعلالرندن دخى سرحدنشينان مملكتلرينه تنبيه بيوريله كه مادام مشار اليه ، ابراهيم آغا ، ايله جميع احوال حضور عالى لرنده سويلنوب عهدنامهء همايون ده و سائر تمسّكات ده اولان قول و قرار نه ايدوكى معلوم اولمينجه كندو راى لريله باعث گفتگو اوله جق اوضاعه متصدى و اختلاف و اختلاله بادى اولميه لرتا كه ميان جانبينده اولان بناء مودّت و محبت مشيد و مبرم و مكر و آسيب فتنه جويان دن برى و مسلم اولوب مساعى جميله لرايله اتمام و اختتام بولان امر خير انجام ، الى يوم القيام ، مؤبد و بر دوام ادله .
ثانيا جام جهان نمادن انور و مانند آفتاب عالم تاب ضيا گستر ، اولان طبع لطافت پرور و ذهن صداقت اثر لرينه حيّز خفاده اولميه كه سوالف اعوام و سوابق ايام دن الى هذا الآن ملجأ سلاطين جهان اولان آستان سعادت آشيان آل عثمان .
ابد اللّه ايام سلطنته مادام الزمان ، ايله اتفاق و اتحاد مسلكنه سالك و ملك مهر و محبتلرينه ( ؟ ) مالك اولان تاجداران روى زمين و شهرياران اورنگ نشين دائما معامله لرندن سودمند و بهرهور و بودولت قديمى يه اعتبار جهتندن مستفيد و كامكار اولمشلردر .
بيت
اين دولت از ازل شده تا آخر زمان * پيرايه بخش سلطنت جملهء جهان
هر صبح روى عجز بدين آستان نهد * از بهر اكتساب شرف شاه خاوران
على الخصوص حالا صدرنشين سرير سلطنت و جهانبانى و صاحب تمكين