صلاح تمام مأمول لرى اوزره حصول بولوب بر مقتضاى آيت كريمهء
وَ أَصْلِحُوا ذاتَ بَيْنِكُمْ
« 1 » اصلاح ذات البينه سلطان البرين و خاقان البحرين خادم الحرمين الشريفين ابد اللّه تعالى ايام خلافته و خلد اعوام سلطنته حضرت لرينك دخى رضاى همايون لرى مقرون اولوب مضمون كلكم راع و كلكم مسئول عن رعيته رعايا كه ودايع بدايع آفريدگار در هميشه زمان با امان لرنده فراغ بال ايله آسوده و ايام معدلت انجام لرنده رفاه حال ايله غنوده اولوب دعاى دوام دولت ابدية الاتصال لرينه فى الغدو و الاصال كمال خلوص بال ايله اشتغال اوزره اولملرينه فرمان قضا مضالرى صورت ارتضا ده بولنمغين رسول معرفت شمول لرى تمام حصول مأمول ايله جانب عزت لرينه عودت ايتدوكى مناسب و معقول اولوب اتمام مقدمات صلح و صلاح خير انجام محض خير و خير محض اولديغنده اصلا كلام يوقدر .
بيت
منهى اقبال درين كهنه دير * غلغله انداخت كه الصلح خير « 2 »
حاليا بو مخلص خالص الولالرى دخى بر موجب حسن العهد من الايمان كما كان اول عهد و قرار اوزره ثابت و استوار اولوب مبانى صلح و صلاح هميشه پايدار و محكم و برقرار اولمق با بنده بذل اقتدار ايتمكه عزم و جزم اوزره دربو - تقدير جه محبت و مودّتى مبرم ايدوب . اظهار اخلاص و يگانگى يه ساعى و رفع عيوب بيگانگى مرعى بيوريله كه بر موجب آيت كريمهء
وَ أَوْفُوا بِعَهْدِي أُوفِ بِعَهْدِكُمْ
« 3 » مادام كه اول جانبدن منبع عذب موالات و مصافات شايبهء تكدّر و تغيّردن صافى اولوب چشمه سار خوشگوار محبت و دوستى يه غبار كدورت راه بولميه
هامش
( 1 ) - سورة الانفال 1
( 2 ) - النساء 128
( 3 ) - البقرة 40