بيان بو وجهله ابراز و اشاره اولنور كه طى نامهء پر بشارت ده تلويح و اشارت اولندوغى اوزره ميان دوستان فلك ثبات ده تجدد وسائل رسائل و مكاتبات استحكام اولصر صداقته باعث تقوى و گلزارهشيم خلته سبب نضارت و تروى اولوب . اسلاف سلاطين عثمانيه ، حفت مراقدهم بالانوار الرحمانية ، غزوهء كفار دوزخ مساقه تشمير ساق ايدوب سربازان عرصهء گير و دار اقدام سعى بىشمار اوزره قيام و دار الحرب مشركين بد نهاد ده نيروى بازوى جهد و جهاد ايله نصب اخبيه و خيام ايتد كلرنده اجداد نباهت نشانكزدن اول عصر و ايام ده مسند نشين اريكهء شاهى و اورنگ ايران زمين ده آمر و ناهى اولان شاهان نيكوكار صداقت ظهور ارواح اهل قبور دن استمداد و استعانه خصوصا عترت طاهره نك روحانيت باطنه و ظاهره لرندن استشفاع و استغاثه ايلمك دأب مألوف و رسم معتاد و مسلوف لرى اولمغله خميلهء جميلهء سلطنتده سرو آزاده اولان برادر زاده مز سلطان عثمان ، رحم اللّه شبابه بعميم الغفران ، دخى سنين سالفه ده جمع كماة رجال و ديار كفرهء بدتباره شدّ رحال ايدوب مضايق دروب و حروبه اقتحام و سرهء مملكت لرينى تخريب و غارته عزيمت و اهتمام ايلد - كلرى اخبار صحت آثارى گوش گذار نواب بهجت شعار اولدقده جناب نباهت انتساب شهامت اكتسابكزدخى رداء همت شاهانه ايله ارتدا و اجداد نجابت نژاديكز اثرينه اقتفا و اقتدا ايدوب
ما يَعْبَؤُا بِكُمْ رَبِّي لَوْ لا دُعاؤُكُمْ
« 1 » فحواسى اوزره جنود غيبيهء دعا ايله عساكر ظفر اعتيادى امداده تعهد و التزام و بونيت خير امنيت ايچون خاك پاك خطهء خراسانه كه ملمع اضواء روح و ريحان در توجه و اعتزام اولنديغى افاده و اجمال و رعايت تهادى و تحاب و اهداء تفاريق بىحساب ايله تهادوا فان الهدية تذهب و حر الصدر حديث عالى قدرينه تأسى و امتثال اولنمش حقا كه اول مشرفهء صداقت تبيان براعت بنيانك ورود و اتيانندن نقاء سريرت و صفاء بال لرينه استدلال و شرايط مودّت پيشينه كه لازمه انشراح سينهء بىكينه در .
هامش
( 1 ) - سورة الفرقان 77