تعظيم امر اللّه جل جلاله * و السعى فى اصلاح ذات البين
بناء على ذلك مصالح حدود و مسالح ده بذل مقدور و سدّ ثلمهء ثغور ايدن مرابطان بيداره تنبيه و انذار اولنمشدر كه رعايت حزم و احتياط و توثيق عروهء اتحاد و ارتباط ده اقصى الغايه كوشش بىنهايه ايدوب طريق مسلوك اسلافه تأسى و ائتمام و احكام مراير صدق سرايرهء سعى و اهتمام ايدهلر جناب كرم انتساب لرينه دخى هرآن حقيق و شايان اولان بودر كه مقام مسالمهء سلامت انجامده پا برجا و پيام سلم و استسلام و اصل اقطار و ارجا اولوب قصب الجيب شكرستان فصاحت و دوربين ملاح بحر بلاغت اولان طومار خلّت اخبار ايله دائما احكام مودّت ديرينه تجديد و شرايط صلح و موادعتى رعايت ايچون سرحد نشين اولان طرف داران حزم آيينه سپارش و تأكيد اولمنه تا كه طرفيندن سوداگران و ابناء سبيل بىمنازعت قال و قيل آمد شد و اخبار سلامت انباسى افواه ناس دن تنشد ايدوب . ذهاب و اياب ده امن طريق و جادهء صواب حاصل و مراعى مساعى رعايا
فَجَعَلَهُ غُثاءً أَحْوى
« 1 » فحواسى اوزره هشيم و ذابل اولمشيكن امطار عدالت و اعتدال ايله اخضرار و اخضلاله و اصل اوله . بوندن زياده خيام كلامه مد طناب اطناب اولنميوب گلزار ذبول يافتهء عهد پيشين باران اخلاص و تمكين ايله سرسبز و طرى و هبوب صباصبابت و ولا ايله مظهر نداوت و ترى اولمق التماس صداقت انتماسى ايله اختيار و اختصار و مأمن حسن الختامه اقتصار اولندى .
همواره ذات صلاح پيشهء فلاح انديشه لرى سلم سلمهء ارتقاء و صعود و اعتلاء كاخ رفعت و سعود ايدوب . كأس دهاق طباع اهل وفاق زلال بقاء عهد و ميثاق ايله الان ملان اولديغى كبى من بعد دخى ماء الحيوة صلح عميم البركات ايله طافح و لبريز و دار الامان پيمان استيلاء فتن آخر الزمان ده حرز حريز اولمغدن ما تعاقب اليقين و الشكّ منفك اولميه .
هامش
( 1 ) - سورة الاعلى 5