و مطرح آثار دولتجوئى و نيكخواهى اولان طبع دقيقه‌شناس دوربين و خاطر حكمت استيناس صفارهين لرينه مكنونات ضمير الهام پذير بو وجهله تصوير اولنور كه عنايت بىنهايت جناب احديت و هدايت بىغايت حضرت ختم رسالت ايله مرجع سلاطين نامدار گردون اقتدار و ملاذ خواقين كامكار جليل الاعتبار اولان سدهء سنيهء فلك فرسا و عتبهء عليهء سپهر آسامزه اولان وفور اخلاصكزى اثبات و مجددا تأكيد اساس موالات و مصافات ايتمك ايچون قاصد استعجال و بريد سريع الايصال ايله ارسال اولنان نامهء همايون مصادقت مآل و رسالهء شاهى بديع المثالكز كه نقاشى كلك دبيران سحر آفرين ايله تصوير و عبارت پردازى طبع منشيان بلاغت رهين ايله كشيدهء رشتهء حسن تعبير اولنمش بر طومار فصاحت دثار و بر مجموعهء محبت شعار بلكه افادهء خبر ده رسول نامه آوردن انطق و لسان الحال انطق من لسان المقال نكته سنه ما صدق ايدى بر وقت ميمون و ساعت همايون حلولنده كلوب خلوتسراى حسن قبوله دخول و محل عرض وانهاده قيام و نزول ايدوب صورت حال و كيفيت احوال منظور نظر اذعان و ملحوظ ديدهء ايقان مزواقع اولد قده فحواى صداقت احتواسى احكام احكام صلح و صلاحى متضمن و ايفاء عهد و ميثاق مورث الفلاحى مبين اولوب . حدود ممالك محروسه خار و خاشاك منازعه دن دورو ايام سعادتمزده رعاياى طرفين سر نهادهء بالين حضور ايدوكنى حاوى و دخى نيجه دوستلق و محبت اخبارينى راوى اولمغله سبب تضاعف اسباب تألف و موجب ترادف آثار تعطّف اولوب صيقلهء حسن معامله لرى تراب مجلاى مصادقتى مجددا تصفيه و نسايم خلوص طويتلرى نخل بارور مخالصتى مكررا تنميه ايدوب . هميشه نگاه داشت سر رشتهء مصافات كار و بارلرى و رعايت مراسم موالات مدار افكار لرى اوله ايمدى طبع صاف و ذهن انصاف اتّصافلرينه حيّز خفاده اولميه كه الى الان صدرنشين اورنگ عثمانى و صاحب تمكين سرير سعادت مصير سليمانى اولان آباء و اجداد عظام مز انار اللّه براهينهم هربرى زوانه سنك قهرمانى و دورينك صاحبقرانى اولمغله دائما تاجداران جهان آستان احسان رسان لرندن رجاده و سايهء سعادت لرينه التجاده اولوب زمان سعادت