عفو و صفحنى رجا و درخواست قيلوب خراج قديم لرى تعهديله كير و طرف همايون پادشاهيدن ايل و مملكتلرى ضبطى ايچون اوامر و بروات سعادات آيات الوب هربرى شاهراه متابعت ده قائم و خدمت معتادلرى اداسنده دائم اولمشلر دراندن ما عدا قريم خانى مرحوم و مغفور له غازى گراى خان دار آخرته انتقال و فرمان حى قيّوم متعاله امتثال ايدوب . خانلق مسندينى خالى و نهى و امر حكومتى موقوف فرمان همايون پادشاهى ايدوب كتد كده اول حابنده اكبر اولادى اولان توختمش گراى سلطان باباسى مسندينه جالس و خانلق خلعتنى لابس اولمق اراده سن ايدوب سدهء سنيه پادشاهى يه عريضهء عبوديت ايله ادمار ارسال ايتدكجه ارث و استحقاق له حق كندونك اولميوب عم بزرگوارى ، اولان و الاجناب سعادت نصاب سلامت گراى خان ، دامت معاليه ، حضرت لرينك حق صريحى اولمغله مشار اليه دن دخى مقدما بعض ضرورت حسبيله صدورايدن سهو و قصور معفو و معذور طوتيلوب آباء و اجدادلرى روش و اسلوبى اوزره در دولت دن برات سعادت آيات ايله قريم ولايتنه خان فرمان ران نصب اولنوب واروب كمال استقلال اوزره تاتار خانلقنه متصرّف و حاكم خدمات پادشاهى اداسنه جان و دل قائم و مداوم اولمشلر در بود كلو تفصيلات له تصديع دن نتيجهء مآل و خلاصهء مقال سعادتلو و عظمتلو و عدالتلو پادشاهمز ، ادام اللّه تعالى ايّام سلطنته ، حضرت لرينك كرم شان و سمو مكان لرين بيان ايدوب . باب سعادت مآب لرى عهد و وفا طالب لرينه مفتوح و مكشوف و نيت خالصه لرى دائما خير و صلاح جانبنه مصروف و معطوف ايدوكين عرض ايلمكدر بالاده مسطور اولان حكام و خواقين اسلاميه و غيريدن صدورايدن سهو و قصور ذيل عفو و كرم لريله مستور و خاطر اخلاص مظاهر - لرندن منسى و دوربيوريلوب هربرينى انواع احسان و التفات لريله معزّز و سرافراز و كما كان ما بينده دوستلق و محبت قپوسين گشاده و باز بيور مشلردر . پس اول شاه جم جاه صاحب انتباه ستاره سپاه حضرت لرى طرف اعلالرندن دخى خلوص نيت و صفاى طويت ايله سعادت لو پادشاه عالم پناه آستاننه ارادت و مودّت اظهار اولنوب آباء و اجداد عظام لرى طريق پر توفيقنده حرم سراى خلّت