عبد الحسين نوايى
47
شاه عباس ( مجموعه اسناد و مكاتبات تاريخى همراه با يادداشتهاى تفصيلى ) ( فارسى )
و محبّته دخول و اسلاف امجاد كرام لرى و اصل اولدقلرى سمت مقبول دن مجلس قرب و الفته وصول مراد اولنسه حاشا كه جناب فياض مطلق جمله ابواب مسدودهيى مفتوح و عوايق و موانعى باسرها مرفوع و مطروح قلميه . لكن اثناى مصالحه و معاهده ده دخى طرفيندن صدور ايدن اوضاع و حالات بروجه اوزره اولمق مناسب در كه بو - بابده شهود اقوال باطنه ايله اثبات اولنان دعوات مصادقتى مزكيان افعال ظاهره دخى تزكيه و مرآت قلوب طرفينده اولان زنگ ملالى صيقل حسن معامله ايله تصفيه ايليه نفس الامرده نظر محاسن اقواله دكل بلكه حقيقت افعاله و دقايق گفتاره دكل بلكه حقايق كرداره در . اميد در كه جناب رب العزّة جمله بوبابده ساعى بالخير اولنلرك ظاهر اقوالنى باطن احوالنه موافق و حسن تدبير و تدارك لرينى تقدير بىتغييرينه مطابق قيلوب . مقدما نوجهله احوال صلح و صلاح متبدل و متغير اولديسه كير و يفعل ما يشاء و يحكم ما يريد فحواى شريفنجه بو كار ناهنجار كدخى تغيير و تبديلنه ارادت و مشيت كاملهسى تعلق ايدوب صحيفهء كون اوزره بسط اولنان اشكال مختلفة اللون اختلال بلطف اللّه تعالى مرتفع و آفتاب عالمتاب اتفاق و اتحاد افق حسن مصادقتدن طالع و لامع اولوب . عامهء فقرايه نافع و مواد فتن و فتورى رافع و قاطع اولان احسن وجوه لايقه و ايمن طرق فايقه اوزره پس پردهء تقديردن بر وضع خوب منتج المطلوب ظاهر و صورت مرغوب بديع الاسلوب جلوهگر مرآت مظاهر اوله . هميشه صدر نشين مسند شاهى و فرمانرانى و منظور عين عنايت سبحانى و صمدانى باد . « 1 »
--> ( 1 ) - منشآت سلاطين عثمانى ( فريدون بيك ) ج 2 ص 351 - 344 .