امين و سالم و نعم جليلهء خوان محبّتدن مستفيد و متنعم اولمشلردر . ان شاء اللّه تعالى فيما بعد دخى بوكار هموار و امر عظيم المقدار ارادت قادر مختار و مشيت خالق پروردگار ايله مقرر و محقق اولورسه طرفينه منافع جليله سى سرايت ايدوب . عباد اللّه آسوده و ديدهء فتنه و اختلال خواب آلوده اولمق اومولور لكن طرفيندن ترتيب مقدمات صلح و صلاح ايدن مدبّران ملك و ملت و تمهيد اساس و دو الفت قيلان مهندسان صاحب فطنت مجرد برطرفك رضاسنى صيانت و همان برجانبك ابتغاسنى رعايت ايدوب صور وقايع و احوالى جانبينك رضاسنه توفيق و ايكى طرفك مراد و مدعا لرينى بربرينه تطبيق ايتميجك بو مقوله امر خطير عظيم - المقدار و كار عسير لازم الاعتبار تمشيت و صورت بولمق دشوار ايدوكى خرد خرده بين لرينه واضح در وارد اولان نامهء نامى همايون فال و مكتوب گرامى عدم المثال لرندن مستنبط و مستخرج اولان خلاصهء احوال و نتيجهء آمالى سدهء سدره مثال و عتبهء فلك اشتمال پادشاهى يه عرض وانهاده عسرت و اشكال معناسى ملاحظه اولنمغين الى هذا الان مشار اليه ايلچى محمد بك بنده لرى در سعادت ده اليقو تيلوب شايد مفوّض اليه صدارت عظمى و اتمام مهام انام ده مقتدى و پيشواى عامهء وزرا ، اولان آصف الزمان ملاذ اهل الايمان ، قاهر ارباب الضلالة و الطغيان ، قامع اصل الشقاوة و العصيان ، صاحب الرفعة و العظمة و الشأن ، صدر اعظم و سردار اكرم سعادتلو و دولتلو مراد پاشا ، اوصله اللّه فى الدارين الى ما يشاء ، حضرت لرى اشقياى لعينك جزا و سزالرينى و يرد كد نصكره در دولته توجه بيوروب حسن تدبير و تدارك اصابت قرين وراى حكمت آراى سعادت رهين لريله بوكار ميمنت آثار جليل المقدار تمشيت و يره‌لر ديو ترقّب و انتظار اولنور كن . الحمد للّه الملك المعبود مشار اليه سردار عاقبت محمود اول جميع ملل و امم دن خارج اولان قوم شوم مردود دن اكثرينك وجود بىسود لرينى عرصهء عالم - دن محو و نابود و بعضيلرين حوزهء حكومت پادشاهيدن مطروح و مطرود ايليوب لوث وجود خباثت آلود لرندن دار و ديار مسلمينى پاك و عرصهء ملك و ملتى رونق حسن انتظام ايله تابناك قيلوب . دولت و اقبال و سعادت و اجلاله آستان سعادته كلوب