و اصل اولوب ، مقارنت حسن توجه پادشاهى و موافقت يمن التفات شهنشاهى ايله امور ملك و ملت انتظامنك روز بروز ازديادينه ساعى و باعث استراحت برايا اولان صلح و صلاح ابو ابنك فتح اولنمسنى داعى اولدقلرى جهتدن بو باب ده مشاركت آراى ثاقبهء وزراى عظام و مقارنت تدابير صائبهء وكلاى كرام و موافقت مشاورهء علماى فخام ايله على الخصوص بوندن اقدم صلح و صلاح موادينك صورت پذير اولمسنده حسن تدارك و تدبيرى محض علت اولان خواجهء پادشاه اسلام و مفتى و مقتداى انام مرحوم و مغفور له مولانا سعد الدين ، اوصله اللّه تعالى الى اعلى عليين ، حضرت لرينك خير الخلفلرى اولوب . بالفعل مسند فتوى و شيخ الاسلامى ده صدرنشين و عقده گشاى مشكلات مسلمين اولوب . امور معظمهء دين و دولت مشاوره سنده جواب باصواب لرى جملهء اركان دولتنه سند خصوصا شرع شريفه مستند اولان احكام و قضاياى سلطنت با بنده صاحب قبول ورد ، اولان مولانا محمد افندى ، ادام اللّه فضله و افضاله على كافة المسلمين ، حضرت لرينك صواب ديد راى شريف لريله صلح و صلاح احوالى طرفينك عرض و دولتنه لايق و آيين و اسلوب سلفه موافق اولوب بروطرفدن عزّ حضور پادشاهى به عرض وانها اولنديغى وقت حسن قبوله قريب و ميل و توجه همايونلرينه باعث ترغيب اوله جق وجه اوزره بر صورت معقوله يه قونيلوب واقع حالى مبين و نتيجهء آمالى معين . مكتوب مرغوب مصادقت مصحوب مخالفت مسلوب لرى ايله كير و مشار اليه محمد بك زيد مجده جناب نعم المرجع و المآب لرى صوبنه لرى روانه قيلنمشدر . فى الحقيقه اول شاه عالى جاه ستاره سپاه حضرت لرينك آستان سعادت آشيان پادشاهى و سدهء سنيهء عدالت عنوان جهان پناهى ايله مجددا مصالحه و معاهده يه نيت جازمه لرى محقّق و مقرر و بو معنى لطيف ضمير منير آفتاب نظير لرنده منوى و مضمر ايسه مشار اليه صدر اعظم و سردار اكرم حضرت لرينك صواب ديد راى شريف - لريله عمل بيوريلوب مكتوب منيف لرنده تصريح و توضيح بيوريلان وجه وجيه اوزره صلح و صلاح احوالنك وجود و ظهور كتورلمنده تأخير و توقيفى جائزور