اوضاع و حالات ايله خلاف عهد و ميثاق و مغاير ود و وفاق گلشن موالات و مصادقت سمتنه بر ناملايم روزگار اسدوكى وقت دخى زمان منازعه يه امتداد و مواد مخاصمه يه اشتداد و يرلميوب فى الحال ارسال رسل و رسايل ايله مادهء خصومت و كدورتى بر طرف و تلافى و تدارك مامضى و ما سلف ايدرلردى على الخصوص اول صدرنشين مسند شاهى و تاجدارى و صاحب تمكين مقام خلافت و شهريارى ، محيى مراسم محبت و دوستدارى ، مجدد لباس مصافات و حق گزارى ، حضرت لرندى بوندن اقدم دولت و سعادتله تخت عالى بخت اوزره جلوس و تكميل مراسم نام و ناموس ايتدكلرى اثناده بو دولت ابد پيمان و سلطنت قوى الاركان طرفنه ديدهء عناد و مخالفت ايله نظر و دائرهء حسن معامله دن تجاوز و گذر اولنمنك و خامت عاقبتن على رأى العين مشاهده و تعيين و سوء خاتمتن منظور نظر عبرت بين ايتملريله فى الحال اسباب مصالحه و معاهده تداركنه مسارعت و رفع خصومت و كدورت خصوصنه سعى و دقت بيوروب شهزادهء پاكيزه گوهر ، مرحوم سلطان حيدر ميرزا ، اثبات كمال اتحاد و ارتباط و محافظهء شروط مصالحه ده نهايت حزم و احتياط ايچون مرجع سلاطين جهان و ملاذ خواقين دوران اولان آستان سعادت آشيان طرفنه ارسال و بواسطهء ايله عقود عهود و مصالحه مربوط و قوى الاتصال قيلنوب سلفك عدم اقدام و اهتمام لرندن ناشى اولان عداوت و شقاق حسن تدبير و تدارك لريله وفا و وفاقه تبديل و زنگار كدورت و نفاق آيينهء صفا آيين خلت دن صيقل حسن اتفاق له تصقيل اولنوب نيجه مدت ما بينده بوكار ميمنت آثار مرعى و مسلوك و شرايط و لوازم مصالحه مؤدّى و نامتروك طوتيلوب بو خاندان ابدى الدولة طرفنه تنسم نسايم ايدن مهر و محبت ايله سبزه زار ملك و ملت لرنده انواع رفاهيت و فراغت ازهارى شكفته و خندان و سكان ولايت و مملكتلرى مياننده اصناف خوشحالى و استراحت آثارى ظاهر و نمايان اولوب مدّت مديده دنبر و پذيرفتهء فتنه و اختلال و خلل يافتهء پريشانى و سوء حال اولان امور و مهمات ملكيه لرى اثر حسن توجه سلاطين آل عثمان و بركت نظر التفات پادشاه سليمان مكان ايله جزئى زمانده منتظم و پرداخته و جميع مهام و مرام لرى وفق دلخواه لرى اوزره مهيّا و ساخته