اردشيرك الندن الدقلرى كى سنك دخى الندن آلورلر ديدكده ارغداق اكر پادشاه عنايت بيوروب سنقور احسان بيوررسه نم المدن كيمسه آلمغه قادر اوله‌ماز ديمكين پادشاه سن بونده قال بويقينلرده ليكى سنقور كله‌جكدر آنى سكاويره‌يم ديدى . ربيع الاولك سكزنجى كونى سلطان شاه و يخشى ملكى دعوت ايدوب كندولرينه اگرلى و اگر سز برر آت و اوتوز طونلق اقمشهء شاهانه و سائر بعض تحف و اشيا و اقچه و چاو و خاتونلرينه اولمق اوزره اون بشر طونلق قماش ويردى . اول كونده اويس خانك ايكىيوز اللى نفر آدمى ايله بويا تيمور ايلچيسى كلوب بولشدقده مجموع اتباعنه خلعتلر كيديريلوب لوازمى تعيين اولندى . ماه مزبورك اون اوچنحى كونى پادشاه ايلچيلرى دعوت و بن شكاره كيده‌جكم اكر كج كلورسم يولكزدن قالمايك ديو سنقورلرينى كندولره تسليم ايدوب الچق آتلر كتوررسكز و كزيده سنقورلر كوتوررسكز . ديو طعن و تعريض ايلدى . پادشاهك نمتاى طرفندن اوغلى كلمكين ايلچيلر ماه مزبورك اون‌سكز نجى كونى خانهء پادشاهينك شرقى جانبده پادشاهك اوتورديغى رسم و آيين اوزره شهزاده‌نك زيارتنه وارديلر . غرهء ربيع الاخرده مهماندار كلوب پادشاه يارينكى كون شهره كله جكدر ديو ايلچيلرى طشره‌يه چيقاروب وقت ظهرده پادشاهك اول كون دخى طشره‌ده مكثى خبرى وارد اولمغين عودت ايتديلر .