معتادى اولمغله سنهء مزبوره صفرينك اولنده ذكر اولنان خانه‌يه واردى سكز كون وجه مشروح اوزره آييننى اجرا ايدوب طقوزنجى كونى كوكبهء پادشاهانه ايله شهره كلمسنى تماشا ايتدرمكيچون ايلچيلرى آتلر ايله شهردن طشره‌يه چقاروب سير ايتديرديلر . پادشاهك اوكنده مزين فيللر و آلتى دانه مطلا محفه‌لر و سياه و قرمزى و يشيل و صارى وژنكارى اوزرلرنده آى و كون ويلدزلر و كوه و دريالر تصوير اولنمش و ختايى يازيلر يازيلمش علملر چكيلوب پادشاهك آردنده و او كنده انواع آلات حرب و ضرب ايله خلايق بىپايان ايدى . مذكورلردن ماعدا پادشاهك پيش و پسنده اللى بيك مقدارى آدم واردى . بربرلرندن بر قدمه ايلرو كيدوب كيرويه قالمغه زهره‌لرى اولماديغندن غيرى كيمسه حرف و صوت ايتمكه قادر اولمامغله اولقدر كثرت ناس وار ايكن كويا بر متنفس يوغيدى . آنجق سازلر ايله پادشاهه دعا صداسى وار ايدى . موسم مرسومده پادشاه سراينك حوليسنده اغاجلردن بر طاغ قدر قبه ياپوب اوزرينى تمام سر و شاخلرى ايله پوشيده ايتمكله كويا كه زمرددن بر كوه ياپارلر . و اوزرنده نيجه يوزبيك چراغ و بربرينه متصل ريسمانلر تعبيه ايدوب نفتدن فشكلر اول ريسمانلرك اوزرلرنده حركته باشلايوب ايرشديكى چراغى ياقمغله بر نفسده اول كوهك اوزرنده اولان بىحد و پايان چراغلر سوزان اولور . بو كاشب چراغ