خطايى ، على اكبر
405
خطاى نامه ( شرح مشاهدات سيد على اكبر خطائى معاصر شاه اسماعيل صفوى در سرزمين چين )
ايكيشر و ماعدانك اوكلرينه برر خوان قوديلر . اول كون خلقك اوكلرينه قودقلرى ، بيك مرتب خواندن زياده اولمق كرك ايدى . مذكور اوطهنك تخت پادشاهى مقابلنده اولان پنجرهسى اوكنه بر بيوك كوس قونيلوب ياننده صندلى اوزرنده بر آدم طوروب ياننده سازندهلر اوطهنك طشرهسنده ايكى يوز بيكه قريب جبهلى آدملر طورمشلردى و تخت پادشاهيدن سخت ياى ايله آتلمش اوق منزلى قدر محلده بر طرفى صارى اطلس پردهلى بر بيوك چادرده پادشاه ايچون طعام و شراب ترتيب اولنوب اياقلى و قپاقلى بيوك حقه ايله تخت پادشاهىيه سازلر ايله كتوررلردى . بو ترتيبلر تمام اولوب ايلچيلر اياق اوزرنده پادشاهك چقماسنه منتظر طوررلر كن تختك صاغ طرفنده اولان پردهنك ايكى طرفدن طنابلرينى ايكى خادم چكوب بر آدم بويى مقدارى حصير كبى دوشورديلر و سازلر چالنوب پادشاه چقوب تخته اوطورديغى كبى جملهسى خاموش اولديلر . پادشاهك باشى اوزرينه اون زراع مقدارى يوكسك و اون درت زراع سايبان مقدارى صارى اطلسدن اوزرنده بربرينه حملهايدر شكلنده باصمه درت اژدر تصوير اولنمش بر پرده قوريلمش ايدى . پادشاه تختده قرار ايديجك ايلچيلرى تخت اوكنه كتوروب بش كره زمينه باش قودردقلرندن صكره پادشاهك اشارتيله معين اولان يرلرينه اجلاس ايلديلر . خوانلرده اولان طعام و شرابلردن وقت وقت دخى طعاملر كتوروب