وارديكه اورتاسنده‌كى بيوك و يانلرنده‌كى كوچوك ايدى . اورتاده‌كى قپو پادشاهك ممرى اولوب هركس آندن كچه‌مزدى . ذكر اولنان ميدانده اوچيوز بيك مقدارى رجال و نسوان جمع اولوب ايكى بيك مقدارى مغنيلر سازلرينى هم آواز ايدوب اصول ختاى و لسان مزبور ايله پادشاهه دعا ايدرلردى . و اون بيك قدر آدم چوماق و كرز و حربه و خشت فولاد و نيزه و شمشير مثللو و ختايى يلپازه‌لر ايله طور مشلردى . ذكر اولنان ميدانك اطرافنده دائرا مادار خانه‌لر و اوكلرنده اوستلرى اورتولى صفه‌لر ياپوب صفه‌لرك كنارلرينه معظم ستونلر قومشلر و خانه‌لرك ديوارلرينى مشبك آغاجدن و زمينلرينى يونلمش مرمردن يايمشلر ايدى القصه صباح اولديعى كبى كوشكك اوررنده پادشاهك تخته چيقماسنه منتظر اولان آدملر دفعة كوس و طبل و بورى و نى و ناقوس چالمغه باشلايوب اول قاپولرى آچديلر . و خلايق ايچرويه سكرتديلر . مزبورلرك قاعده‌لرى پادشاهى كورمكه كيتدكلرنده سكرده رك كيدرلردى . ذكر اولنان ميدانده‌كى اوچيوز اياق مقدارى ايدى . ذكر اولنان كوشكدن بيوك بر كوشك وار ايدى . اوكنه درت زراع ختايى زرنشانلر و اژدرها و سيمرغ و سائر نقوش ياپلمش . بر تخت قويوب اوزرينه آلتون بر كوس قومشلر ايدى . و تختك صاعنده و صولنده اون ايكى ديوانه متعلق امراى تومان و بيك و يوز بكلرى طوروب اللرنده