قدرت كلوب اول طاغ اوزرينه واررواندن نره‌يه مراد ايتسه پرواز ايدر و اكر اول ميخ اوزرنده اوتورمغه قادر اولميوب كندويه اويقوغلبه ايدرسه دوشوب پاره‌پاره اولور و اول طائفه‌نك بدنلرنده همان درى و كمك قالور و اكل و شربلرى بعض ادويه‌لرى صوايله قينادوب ايچرلر و اول جماعتك رياضتلرى بر مرتبه ده در كه يميوب ايچميوب و اويوماقدن بر چوبه دونوب اوج كون اوج كيجه ده بركره نفس ويروب ذكر اولنان ادويه ايله قينامش صويى ايچوب ينه حبس نفس ايدر و بعضيلر شويله ورزش و عادت ايدرلر كه نفسلرينى ذكرلرى يولندن چقاررلر باب ثامن عشر مسكوكاتلرى بياننده‌در اول ديارده اقچه يرينه قطعه‌قطعه كاغذلر كسرلر و اوزرلرينه سكه مهرينى اوروب بلده‌لرنده صرف اولنور نوقتكه مذكور كاغده اعتبارلرى ازلسه حكم واردر اولوركه اسلوب قديم اوزره صرف و خرج ايده‌لر بعده كيمك حدى واردر كه بيع و شراده مخالفت ايده و اول ورقه‌لر صرفدن پاره‌لنوب ضايع اوله راضى اولورلر كه اول مابيلرنده رايج و روان اوله و خالص التون و كمشلرينه بو ديارلرده اولان رسوم اوزره سكه ايتمزلر همان ميزانلرى اوزره پاره‌پاره كسوب عيارنجه خرج ايدرلر و اصطلاحلرنده يوزبيك انك يوزبيك سير ديرلر هر سر ديدكلرى اون درهم كمشدر و اول ولايتك ار و عورتلرى باجمعهم صراف و مبصرلر در مابنيلرنده اون نوع اقجه صرف اولنور جميعيسنك قدر و مراتبين بيلوب اكاكوره بيع و شرا ايدرلر و اولولايتك محله و بازارلر جميع امور ايله اراسته و پيراسته اولوب خصوصا اتشبازلقده خور و بزركلرى و مرد و زن ماهر اولوب باروت دوزرلر باب تاسع عشر قانونلرى حفظ و حراستى بياننده در اولبابده بر مرتبه ده اعتبارلرى واردر كه پدر پسردن و پسر پدردن سر مو خلاف قانون بر وضع كورسه‌لر فى الحال حكامه عرض ايدوب خلعت و بخشش الورلر اكر اول فعل موجب قتل ايسه ده كتم ايتميوب افشا ايدرلر و حفظ و حراست حركات و سكنات خصوصا كلماتده بر مرتبه ده در كه كوچك و بيوك برايشى ايكى كره بيورمق و بر سوزى ايكى كره سويلمك يوقدر و قانونلرى دكلدر كنهكار اولورلر و ترحم ايتميوب جزا و سزاسى اوزره انتقام ايدرلر بران تأخير اولنماز باب عشرون نكارخانه‌لرى بياننده در جميع ممالك چينده هيچ شهر و محله و بازار يوقدر كه صورتهاى عجيب ايله مصور و منقش