نكارخانه‌لر اولميه مثلا تمامت ملك چينده بر حولى يوقدر كه مقدارينه كروه نكارخانه وضع اولنمامش اوله و خانبالغده هر طائفه ايچون فراده فراده انواع اطعمه و ميوه هاى رنكارنك ايله ملون اوج سماط چكيلور و اطرافنده سراى خاص خاقاندن سازنده‌لر و كوينده‌لر و اول شهرده لعبت بازلر حاضر اولوب اول اثناده درون سرايدن بر خادم مهتر و بيرون ديوانخانه ده اولان امراء لشكردن بر امير معتبر انواع تجملات و ميانلرينه يشب كمرلر باغليوب اول سماطلرك اوزرينه حاضر اولورلر و يشب كمرلردن چقاروب التوندن انواع جواهر ايله مرضع كمرلر قوشانه رق سماطلر اوزرنده طوروب مهمانلره عيش و نوشه اجازت و اكل و شربه اشارت ايدرلر و سازنده‌لر سازلرك الوب و خواننده‌لر او از خريدهء دردناك ايله ناله‌لره اغاز و بازيكرلر كروه كروه انواع اصول ايله جلوه‌لر ايدرلر بوساز و سوز و صحبتلر اثناسنده اونرياشنده همقدح و همزاد اون دخترنيك اختر اطلسهاى زربفتلره مستغرق كاكللرينى پريشان و زلفلرينى خلقه خلقه ايدرك اول لعبتان چين و اول غنچه‌هاى نوباوه و نورسيده كللر سكفته اولوب انواع اصول ايله رقص كنان اول ميانه كلوب اون ايكى مقام ويكرمى درت شعبه اوزره بازيلر ايدوب شويله كه اهل مجلسك سرور و نشاطلرندن فرياد و فغانى اسمانه برابر اوله رق بو اسلوب اوزره دخترلر مجلسدن چقدقده اون درت ياشنده اون دانه محبوب خورشيد طلعت ملك نهاد و قمر بهجت حورىنژاد انواع لطافت و ظرافت ايله مجلسه كلوب انواع اصوللر ايله رقص ايدرلر انلرك حلاوت نظاره‌لرى و حرارت سماع و طراوت عذارلرى كورمكه و ايشتمكه موقوفدر قلم و زبان ايله تحرير و تقريرى ممكن دكلدر فصل و اول ولايتده اوج نسنه واردر كه اندن اعلامكرجنتده اوله بر عنابدر كه كوچك المامقدارنده در وطعمنك لذتى قابل تعبير دكلدر و ايكى چيچك واردر كه برى كوكنار و برى نيلوفر و هر برينك بيوكلكى كوچك صحن مقداريدر و هر برنيك يوزيپراغى و سكسان طقسان رنكلرىواردر و اهل چين اكابرنيك لباسلرنده كلى تكلفلرى واردر شويله كه هر برينك ايكى اوچيوز قفتانلرى واردر و قفتانلرى دكشديره رك اوتوز قرق سنه كيرلرينه كهنه اولميوب يكى كبى طورر فصل و موتالرنيك تجهيز و تكفيننده رسوم و ايينلرى بودر كه كندى حياتلرنده مقبره‌لرك