كتوررلر و صنعت ايله اياقلريله اصول اوزره اوره رق اوينارلر شويله كه بر اقمازلر كه طوپ يره دوشه و يا دائره‌لرندن چقه و صورت بازلق دخى انلره مخصوصدر مثلا ارسلان و قيلان و سائر حيوانات صورتلرين دوزوب كيرلر و ذكر اولنان يرتجيلر هيئتنده اغزلرك و پنجه‌لرين اچوب بربرلرينه حمله ايدرك غريب اصوللر ايله عجيب اويونلر كوستررلر و اول كروه اويونلرين تمام ايدوب چقدقده صورت اخرايله بر فرقه دخى كلوب اوينادانلر دخى چقدقده بر نوعى دخى ميدانه كيررلر بو منوال اوزره بىنهايت صورتلره كيره‌رك اللرى و اياقلريله انواع بازيلر كوستروب اصولدن چقمازلر حاصل كلام ايتدكلرى حركات و سكناتك حقيقتى كورمكه موقوفدر تعريف و توصيفى قابل تعبير و ممكن تحرير دكلدر فصل و علم نجوم عندلرنده غايت معتبر در و اول علمك افضل و اكملندن درت نفر كمسنه‌يى اولكى سرايك طبقه‌لرندن باغ و بستانلرندن اهل و عياللريله بشقه بشقه مكانلرده انواع عزت و حرمت ايله جميع لوازمات و مهمانى خاقان جانبندن و يريلوب انلر محبوس كبى اصلا طشره‌يه چقامزلر و اول نوروز ده كه افتاب عالمتاب برج حمله نقل ايدر اولوقت انلرك هر بريسى بر تقويم چقاروب خاقانه عرض ايدرلر و خاقان اول زمانده اولان حكما و فضلا و سائر منجمين جمع ايدوب اول تقويملرك اقوال و احكاملرندن متفق عليه اوله رق بر نسخه ترتيب و ترجيح ايدرلر بعده خاقان جانبندن اول تقويمك يازلمسنه امر اولنوب كاتبلره ويريلور و هر كاتب اون كاغذى بربرى اوزرينه قويوب تقويمى يازر و كاغذلرى حريردن اولوب غايت لطيف و نحيف اولمغله بر كاتبك كتابتندن نفيس اوله رق اون كاغذه تأثير ايتمسيله بر كاتبك بر يازمسيله اون تقويم چقار و اون كاتبدن يوز نسخه و يوز نسخه دن بيك رساله يازيله‌رق بو منوال اوزره بر هفته ده بر خزينه تقويم طولار بعده علما و وزرا و امرا و سائر اهل قلم و اون كشىيه حاكم اولنلره برر تقويم ويرلمك امر اولنوب مكتوب اولان تقاويم عربه‌لره تحميلان اقاليم چينه تقسيم و منتشر اولور و اول ولايتك خلقى وقت و ساعتلرينى عايت حفظ و حراست ايدوب وقت فوت ايتمزلر و نصيحت و سياست عالم ايچون عبرتلر و متاع خلقه علامتلر ايدوب و شعر و معما و لغزه دخى واقف و مشغول و الحاصل هرفنده زياده سيله عالم و ماهر درلر باب ثالث عشر بر وجهله قانونلرى ربط اولمسنك سببى بياننده در زمان اوائلده ممالك چينك سلطنتى محلول اولوب و سلطنته مناسب رجالدن كمسه