خطايى ، على اكبر
236
خطاى نامه ( شرح مشاهدات سيد على اكبر خطائى معاصر شاه اسماعيل صفوى در سرزمين چين )
و برى ضابط جميع عسكر ظفر رهبر در و برى ممالك چينده انشا اولنان شهر و حصار و ديوانخانه و منزلخانهلر و سائر ميرييه متعلق ابنيهلر اوزرينه ناظر در و برى مالكلرنده اولان جميع محبسلرك اوزرينه ناظر در و مومى اليهم سنه ده بركره كند و لره متعلق ديوانلرك امورينى على وجه التفصيل دفتر ايدوب ايچر و ديوانخانه ده اولان كندولره متعلق اولان حكام با احترامه ايصال ايدرلر انلر دخى بطريق الاجمال يازوب خاقانه عرض ايدرلر و خاقانك اول سال فرخنده فالده واقع اولان احوال معلومى اولور زيرا هر مهم ايچون خاقانه كرات و مرات ايله صدور بولان امور عرض اولمغله زياده كسب معلومات ايلمشدر و كيجه و كوندزده خاقانه اوج وقت تعيين تقسيم اولنمشدر بر قسمى عيش و نوشه و بر قسمى خواب و استراحتنه و بر قسمى امور مملكت ضبطى ايچون خط و نشاننه و رعا اوزرينه حكومتنه مخصوصدر عيش و استراحتنه تحصيص اولنان وقت خاقانك اختيارينه موقوفدر كرك عيش و عشرت و كرك استراحت ايليه اما وقت سلطنت و حكومتى كلدكده هيج تأخير و تقصيره اقتدارى اولميوب اكر خوابده اولسه دخى ايقاظ ايدرلر زيرا وقت معين فوت اولسه مصالح عباد تأخير اولوب ترك قانون لازمكلور و اول كون نوبت و خدمتده اولان خدمهلر خاقانى اوياندر مدقلريچون كنهكار اولورلر و خاقان چين برايده اوچكره بو وضعى ايدرسه قانونلرى اوزره سلطنتدن معزول اولور و وزرا و امرا خاقانلرنيك غايت عدلندن بر كناهنى عفو ايتسهلر جائز در و اما سائر امرا و حكامدن بر كناه صادر اولسه مأخوذ و معاقب و مرتبه و منصبلرندن عزل اولوب بند و حبسه مبتلا اولورلر اكر خاقان بعض وزير پر تدبيرك بر كناهنى عفو ايلسه جائز در امانا در الوقوعدر پس خاقان و وزراسى قانونلرينه بو مرتبه ده رعايت و صيانت ايتدكد نصكره سائر خلقك نه حدلرى وار در كه مخالفت ايدهلر اول جهتدندر كه نيجه بيك ييلد نبر و بلدهلرى اصلا خرابى كورميوب كوندن كونه معمور و ابادان اولمقده در باب سابع ممالك خطانك زندانلرى بياننده در خانبالغده ايكى زندان واردر كه برينه شيربو و برينه كمبو ديرلر ايكنجى زندانك محنت و عقوبتى سخت و شديد اولمغله اندن صاغ خلاص اولان نادر در اولكى زندانك شدت و مشقتى اندن حقيقدر كه اكثرى سلامت اوزره چقارلر هر ايكى زندانده عورتلر ايچون بشقه مكان واردر و هر شهرده زندانلر اولوب كناهلرينه