وجود بد بود بىتابنى نائرهء دوزخ تاب خشم شهريارى ارادهء اذابه ايدوب اول سرحد و ثغورده جمعيت عسكر منصور اقتضا و ايجاب ايلدكده بو حركتدن منافى صلح و مودت بر حالت ملاحظه اولنمامق مصلحتى ايچون مكاتبه اولندقده شقى مزبوره مساعده و معاونت كه مغاير مصالحه و مخالصت در بر و جهله ارتكاب اولنمز ديو ضمن كتاب مشكين نقابده مراسم مودت بىارتيابه مناسب جواب با صواب اولمشيدى .
الحالة هذه اول طرفه التجا ايدن اشقيا داخل حيطهء و حمايت اولمق اول بد - خصلت لره عين معاونت و مظاهرت اولديعى ظاهر و بو طرفه مخالفت اوزره اولنلره موافقتك شرايط الفت و وداده مخالفتى بين و با هر در بو امر غير مرضى مبادا تكدر سرچشمهء و داده مفضى اوله لايق حال و موافق ذكر مآل بودر كه اول گام زن وادى شفا اولان اشقيايى مضبوط و مقيد والى بغداد اولان و زير مكرم عزتلوو رفعتلو قرنداشمز مصطفى پاشا حضرت لرينه ايصال و تسليم ايتمكله اركان محبت و ودادى مشيد ايليه لرمابينده بومقوله صلاح ذات البينه مباين امر ناملايم واقع اولدقده وكلاى طرفينه مدافعه سيله تقيد لازم اولوب . بو مخلص خير انديشه لايق اولان عمل موافق اعمالى اهمال اولنمدى جناب معالى نصاب لرينك دخى بو بابده تشييد مبانى صلح و صلاح و تأكيد قواعد فوز و فلاحه اهتما ملرى لايق و سزا ايدوكى بىريب و مرادر .
لا يزال مجارى احوال جانبين بر منهج استقامت واقع و درارى امور جمهور طرفين از مطلع خير و سعادت لامع باد برب العباد . « 1 »
هامش
( 1 ) منشآت فريدون بيك ج 2 ص 388 - 384 .