مبتغاسنجه آفاقه و لوله و ثور زمينه زلزله ويروب عرصهء گير و دار ده در كار اولان بوگونه انواع جنگ و پيكار و اصناف حرب و كارزارك تعبير و تقريرنده السنهء اقلام قاصر و حوصلهء دفاتر فاتر اولوب محصور اولان حصار استوارك حصانت و مناعتله اشتهارى و رصانت و متانت ايله اقطار عالمه انتشارى مشاركت دينيه و مجانست ملت مسيحيه مقتضا سى اوزره جمله ملوك نصارايه
وَ ظَنُّوا أَنَّهُمْ مانِعَتُهُمْ حُصُونُهُمْ
« 1 » مضمون شريفنجه مدار استظهار اولوب اول حصن رصين بودفعهدار موحدين و مظهر انوار دين مبين اولمق علائمى نمايان و مستبين اولدقده هر برينك آتشگير درون تيره لرندن نيران غيرت جاهليه فروزان اولوب الكفر ملة واحدة مضمونى اوزره ممالك فرنگستان ده فرمانران اولان جمله صناديد كفار هر برينه استنصار و استنفار و اصرار عناد لرينه استقرار ويروب محصوراولان ملت مدمر و مقهوره هربرى لوازم قلعه دارى ايصالنده بذل مقدور ايدوب پى در پى ارسال اجناد و هر گونه تأييد و تقويت له امداد ايتملريله طرفيندن اشعال نواير حرب و قتال اشتداد و امر محاصره امتداد بولوب غياث الاسلام و المسلمين ، معين الملة و الدين .
نظم
حامى حوزهء مسلمانى * كار او شرع را نگهبانى
شوكتلو و عظمتلو و قدرتلو افنديمز پادشاه روى زمين حضرت لرى تأييد دين مبين و تقويت مجاهدين ايچون درياى حميت جهانبانى لرى جوشش و سطوت كوه تمكين خسروانى لرى جنبش ايدوب بالذات بوغزاى كبرايه عزيمت و پايتخت صاحبقرانى لرندن حركت بيوروب .
نظم
روان شد سوى دشمنان كينه خواه * به نيروى اقبال و عون إله
ركاب همايون هلال مثال لرى خدمتنده شتاب ايدن عساكر ستاره حساب ايله ماهچهء رايات نصرت آيات لرى هر روز بر منزلده ظهور و بروز ايدوك فرو شوكت و شمور ايله معبر جزيره اولان ساحل بحره مدانى بر جاى دل فروزه نزول ارزانى بيوروب
هامش
( 1 ) - سورة الحشر 2 .