نظم
به هر كار مشكل كه راى آورد * به آسانى آن را به جاى آورد
مضمونى اوزره شاهباز همت كار سازلرينه آماده اولان اول شكار زخم خوردهيى پنجهگير تسخير ايتمكه عزم ظفر جزم همايونلرى مصمم و مبرم اولمغله مقدما ارسال مهمات محاصره ايله بعث اجناده مباشرت اولنوب اول حظيرهء جهاد اولان جزيرهء عديم النظيره خدمت سر عسكرى ايله بو مخلص صافى ضميرى كز عبوره مأمور اولوب .
اسباب قتال و ابطال رجال ايله مالامال هلال پيكر و كوه مثال سفاين ميامن دفاين ايله صوب مقصد ظفر مآله سكان عزيمت إله اولنوب مساعدهء شرطهء توفيق مرسل الرياح ايله جزيرهء مزبوره ساحلنه لنگر انداز قرار و ارتياح اولوب نتيجهء فتحك ترتيب مقدماتنه مبادره و گذران اوان شتادن صكره قلعهء مزبوره عساكر انجم شماره ايله هاله وار محاصره اولنوب هر طرفنده اسباب كار زار و ادوات گيرودار احضار قيلنوب مواضع عديده و مواقع پسنديده ده وضع اولنان قلعه كن و برج افكن طوپلر تتابع ضروب ايله همواره قلع بنياد ناپايدار وجود دشمن و در و ديوار حصارى پر شكن ايدوب هميشه شيران رزم آزماى هنگ آهنگ و جنگاوران پولاد چنگ دانهء تفنگ ايله ارواح خبيثهء كفار لئامى صيد دام مرگ ايتمكله در كار اولوب دشمن هزيمت نصيب دخى .
بيت
چو داند كه تنگ اندر آمد نهيب * به كار آورد رنگ و بند و فريب
مصداقنجه روز شمار ده صرفهء كارلرى اوله جق نار دوزخ دن مستعار آتش بار لقى بازار كارزار ده شعله بار و مدار كار و بارلرى اولان گوناگون حيله ساز لغى سرمايهء جنگ و پيكار ايدوب . شب و روز روى زمين ده نيران قتال معركه افروز اولديغى كبى تحت الارض دخى
إِنَّ زَلْزَلَةَ السَّاعَةِ شَيْءٌ عَظِيمٌ
« 1 » مصداق كريمنه نمونه طرفيندن اتيلان لغملر
ع زمين گشت جنبان تر از آسمان
هامش
( 1 ) - سورة الحج 1 .