معروف و شهير قنديه نام قلعهء دشوارگير و معسورهء كليهء عسيرة التسخير كه طرف شمالنه بحرك اشتمالى و جهات ثلاثه سنه بسيط برتالى اولوب جوانب اربعه سى اشكال انتاج فتح و ظفرده شكل رابع جامع انواع غرايب بدايع نمايش ده كوه البرز و الوند و خارج خندقى قلعه مانند آلات جنگى مرتب طابيه لرايله بند اولوب تيشه كارى نقابان فرهاد پيشه آثارى لغملرايله درون و بيرون خندقنك زير و زمينى عبرت نماى و هم دوربين بر حصار رصين البنيان كه متانت و استحكامى مسموع جهانيان و مناعت و حصانتى ميان عالميان ده كمال شهرت بولمغله مستغنى عن البيان در زمان يسيرده فتح و تسخيرى امكان پذير اولمامغله اول اوان ظفر عنوان تضييق فريق اعدا ايچون مقابلنده بر قلعه بنا و مجاهدان اسلامه مقر و مأوى قلنمغله بر حسب فرمودهء
قاتِلُوا الَّذِينَ يَلُونَكُمْ مِنَ الْكُفَّارِ
« 1 » ليل و نهار حصارى لرايله جنگ و پيكار استمرار اوزره اولوب
وَ إِنَّ جُنْدَنا لَهُمُ الْغالِبُونَ
« 2 » مضمون سعادت نموننه ما صدق اولان عسكر ظفر مقرون نيجه سنده محصور اولان دشمن مغبون مقهور و زبون اولمغله كشف وار درون حصاردن باش چيقار مغه اقتدار لرى اولميوب سرير آراى سرافرازى پادشاهمز ابوالفتوحات و المغازى كه همواره باز بلند پرواز فتح و فيروزى دست آموزى و هميشه خاشاك كفر و اشراك سوختهء تيغ آتشناك عدو سوزى در مقتضاى ناموس سلطنت و جهانبانى و لازمهء همت كشورستانى اوزره بلاد مشركين ده اعلاء كلمهء دين و اجراى احكام شرع مبين ايچون .
بيت
جهان را به تيغ و به نيروى دست * گشاده سراسر بدين سان كه هست
و فقنجه بوسنه روم ايلى سر حد لرينه ملاصق ولايت انكروس و ساير ممالك كفار منحوسه سفر همايون ظفر مأنوسلرى واقع اولمغله اول حصن حصينك فتح و تسخيرى تقديم اهم اقتضا سيله تأخير اولنوب حمدا لله تعالى بر وفق مرام قهر و تدمير اعداى لئام ميسر اولوب هر طرفدن نعم فوز و ظفر ايله اغتنام و هر جهتدن مصالح سفر امرى قرين اختتام اولدقده وابستهء عقدهء تأخير اولان مهم بايسته اتمامه قصد و اهتمام اقتضا ايدوب .
هامش
( 1 ) - سورة التوبة 123
( 2 ) - الصافات 173 .