صمدانى ايله بوسال فرخنده فالده بومخلصلرينه ميسر اولان فتوحات جميله و خيرات جليله تحرير كتاب عنبرين نقاب تبشير اولنمشدر عالى حضرت معالى مرتبت گردون بسطت قمر بهجت عطارد فطنت ناهيد عشرت خورشيد اضاءت برجيس سعادت بهرام صولت كيوان رفعت كسرى عدالت دارا درايت كيقباد تخت فريدون بخت ، شاه سرير حشمت و كامكارى ، ماه منير سپهر بختيارى ، زينت افزاى اورنگ سرورى ، شوكت نماى اريكهء داورى ، فرمانفرماى ملك عجم ، المحفوف بصنوف عواطف عوارف الملك الاله ( سليمان ) شاه وفقه الله لما يحبه و يرضاه صوب صواب مآبنه محض عاطفت صفوت شعار صاحبقرانى و عين رأفت مخالصت و ثار خسروانيدن لايح اولور . بدايع دعوات صالحات مسكية النفحات و صنايع تحيات وافيات وردية الفوحات تقديم و تمهيد و اساس موالات تشييد و تأكيد اولند قد نصكره ضمير بىنظير مرآت نما وراى متين جهان آرالرينه روشن و هويدا اوله كه كفرهء فجرهء مللنده انواع مكر و حيله ايله مشهور آفاق و مكار باهر الشقاق درگاه الوهيت پناهه اضافهء شريك ايلين كفار و نديك قديمى مرجع سلاطين دوران اولان سدهء فلك دستگاه راسخ البنيان مزه استناد و استيمان ايله ظل ظليل معدلت عنوان مزده امن و امان اوزره كچيوب ساير جزيه گذار كفره سى شابه سنده ايكن معمورهء مشهوره سى اولان كريد جزيره سى كه صعب المرور و كمال متانت حصارايله جهات سته سى محصوراولمغين مدت مديده و عهد بعيددن بر و بغى و طغيان و شقاوت و عدوان اوزره اولان افرنج خدعه سنج قورصنلرى و رهزن لرينك مأوى و مسكن و ملجا و مأمن لرى اولدوغندن غيرى ايچنده صورت صلاحده اولان ملاعين غراب جناح دائما مترقب فرصت اهل بهار و اموال تجارى نهب و غارت بشايله اهل اسلامه اصراردن خالى اولميوب خيانتلرى آشكارا اولمغه
عَسَى اللَّهُ أَنْ يَكُفَّ بَأْسَ الَّذِينَ كَفَرُوا
« 1 » اشارة پربشار تيله بوندن اقدم مقيم روضهء نعيم والد ماجدم سلطان ابراهيم سقاه الله تعالى صوب كوثر غفرانه و كساه ثوب ثواب رضوانه زمان سعد اقتراننده جزيرهء مزبوره نك لب دريا ده واقع حانيه « 2 » و رتيمو « 3 » و اياتودورى « 4 » نام متين و مستحكم و وسيع و معظم قلعه لرينى نيروى سطوت جهانگيرى و بازوى شوكت عدو
هامش
( 1 ) - سورة النساء 84
( 2 ) -Canee. در متن : حانيه
( 3 ) -Rethymoدر اصل : ريتمود
( 4 ) - چنين نامى نيافتم