مقدما اسير و گرفتار اولنديقى اشعار اولنمش . ضمائر اولى الابصاره خفى و پوشيده دكلدر كه ايكى عسكر بيننده جنگ و حرب واقع اوليجق برى غالب و آخرى مغلوب اولوب . برنوبتده مغلوب اولان دفعهء ثانيه ده غالب اوله كلمشدر . عادت الهى بونك اوزرينه جارى ايديكنه ارباب بصيرت و اهل وقوف خبير و آگاه لردر چون كه مآل كارزار بومنوال اوزره در اول مقوله حال ايله افتخار قاعدهء انصاف دن انصراف دكلميدر . اگر اول جانبدن دخى گرفتار اولنلر تعداد و تذكار اولنورسه سوء ادب اولديغندن غيرى مورث شرمندگى و باعث قيل و قال اوله جغندن ذكر و اظهارينه تنزل اولنمامق اولى فهم اولنور . الحالة هذه خلاصهء كلام و محصل مرام اول در كه كچن سنه نويد صلح و صلاح پذير ايله سفر ظفر اثر عوق و تأخير اولنوب . بوسنه دخى جواب خيره منتظر اولوب منازل و مراحل ده مكث و آرام ايدرك اياق سور ييوب كلنوردى و سبب تأخير خبر سفير مصالحت پذيرايدى . لكن سرحدلر كزده اولنلرتك طور ميوب مملكت مزه مضرت قصدينه عسكر چكوب تا ارض رومه كلد كلرى خبرى كلمكله بزدخى تأخير و آرام دن فارغ اولوب ارضرومه داخل اولمشيكن قاصد اصلاح مقاصد محل مزبوره كلوب و اصل اولدى اويله اوله استرداد بلاد مغصوبه يه سعى اولنوب . قطع سنور و تعيين ثغور اولنمسى تكرار شافى جواب نتيجه بخشه مرهون اولوب . بو مقوله مقال بىمآل ايله تأخيره مجال امر محال اولمغين بلاد مغصوبه استخلاصنه عزيمت اولنوب بو مكتوب محبت اسلوب دخى ارسال اولنمشدر . لكن توجه مزصلحى نافى دكلدر اولدخى معلوم عالى لرى اوله كه شمدى يه دكين بو جانب لره تعيين اولنان سردار لر وزير اعظملق خدمتيله بكام اولميموب اول خدمته مأمور اولنلردن انجق مرحوم عثمان پاشا كلمشيدى انكله يگيچرى آغاسى ايله جمله يگيچرى و آلتى بلوك آغالرى و جمله بلوك خلقى و روم ايلى عسكريله روم ايلى بگلربگيسى مأمور اولمشيدى . حالا اول وقت مأمور اولد قلرى اوزره جمله اعيان دولت و اركان سلطنت و واليان مملكت و وزراء صاحب قدرت معاخذمته مأمور لردر .