جوابى ارسال بيور لمامغين كير و مومى اليهما يدلرندن اشرف اوقات و ابرك ساعات ده وارد و و اصل و مضمون بلاغت مقرون و براعت مشحوننه من اوله الى آخره اطلاع كلى حاصل اولوب . مطاوى سنده درج بيوريلان عبارات رايقه و استعارات فائقه خاطر نشان مخلصى اولمشدر . طبع مستنير و ضمير خورشيد تنوير لرينه كه مجلاى انوار غيبى و مظهر فيوضات لاريبى در اخفى و مستتر بيورلميه كه مقدما ارسال اولنان مكتوب مصالحت اسلوب ده اگر جانب اعلى حضرت شاهىدن بغتة غصب اولنان ممالك استردادينه رضاى اعلالرى مقارن اولورسه بو خيرانديش مخلص لرى دخى دامن در ميان ايدوب استرضاى خاطر همايون پادشاهى يه مقدورمز صرف ايليوب واقع اولان نزاع سببيله ارتفاع بولان غبار شور و شر قطرات سحاب و صلح و صلاح ايله تسكين اولنمغه سعى اولنور ديو درج اولنمشيدى نامهء نامى و ملطفهء گرامى لرنده سابقا جد امجد لرى مرحوم شاه اسمعيل ثانى زمانند نبرو واقع اولان بعض تفاصيل احوال گذشته تحرير و تسطير و وقوع نقض عهد جانب و الا لرندن تبعيد اولنمغه متعلق نيجه مقدمات ايراد و تذكير و مطمح نظر اولان مقدمهء مرضيه دن كه مآل و محصل ورقهء خلوص بدرقهء در تجاهل و اغماض بيورلديغندن ماعدا استظهار تاتار ايله تعريض اولنوب مقدما خانلرى گرفتار لرى اولديغنه مباهات اظهار النمش ضمائر اولى البصايره ظاهر و نمايان دركه ايكى عسكرما بيننده محاربه و مقاتله واقع اوليجق احمدهما غالب و جانب آخر مغلوب اولور و نيجه رؤساء كاردان بلكه پادشاهان عظيم الشان اسير و گرفتار اولمق شمدى واقع اولما مشدر بردفعه مغلوب اولان بر دفعه ظفر بوله كلمشدر سلاطين سلف زمانند نبر و عادة اللّه بوكاجارى اولمشدر و اهل عالم ما بيننده بوحال متعارف و مشهور در . حال بو منوال اوزره ايكن تاتار عسكرينك سردار لرى بزه اسير و گرفتار اولدى ديو افتخار ايدوب مباهات اولنمق دأب مروت دن و قاعدهء فتوت دن دورد كلميدر و اول جانبدن دخى گرفتار اولنلر تعداد و تذكار اولنورسه خجالتى مورث و شرمنده لكه باعث اوله جغندن اول مقوله احوالك ذكر و اظهارينه