بكاويررسن شمدى دشمننك باشنى سكاكتوره‌يم خاقان دخى غايت عجزندن رضا ويروب عهد ايلدى و اول كلب شويله عظيم الجثه ايديكه هر قولاغى قلقان كبى ايدى همان اوج درت كره صچرايوب دشمن عسكرينه يتشدكده هول و هيبتندن لشكر عدو اوكندن قاچدقلرنده بر ضرب ايتمسيله پادشاه عدونك باشنى بدنندن قوياروب خاقانك اوكنه كتوردى خاقان دخى ياخوفندن و يا عهدنه وفاسندن وعدينه وفا ايدوب كريمه سنى اول كلبه تسليم ايلدى كلب دخى دختر خاقانى الوب طاغ جانبنه روانه اولدى و دختر مذكوره‌نك اول كلبدن جوق اولادى ظاهر اولوب بعد زمان اول كلمب هلاك اولدقده قزى خانه خبر كوندروب واقع حالنى و اولاد و احوالنى اعلام ايتدكده خاقان كلى انعام و احسان ايدوب اول طاغى اول قومه تمليك ايلدى حالا تبت خلقى اول سك ايله دختر خاقانك نسلندندر و اول كلب مسحور ايدى ديرلر و اول جنس كلبلر اولور كه ارسلان ايله جنك ايدرلر و تبت خلقى انلرى كوچكدن شكار ايدوب تربيه ايدرلر كه تا كه انسان ايله موانست ايليه كه خاقانه پيشكش كتوره‌لر زيرا غايتده معتبر هدايا لرندندر و پادشاه عالميناه خليفهء روى زمين سلطان روم حضرتلرينك دخى دركاه عاليجاهلرنده اول كلبلردن واردر كه ادينه ساساقى ديرلر اما اصلى ذكر اولان كلبلردندر كه ولايتلرنده شكارلرى مسك اهولريدر فصل هنديلرك و هدايالرك بياننده در اول قومك معتبر هدايالرى فيل و زرافه در و اول ولايتلره كلان خلق صورتده عورته مشابه‌لر در و بزلرى قوما ديلركه انلر ذاتا ادمى عورتمى بله لم زيرا اوزرلرنده نكاهبانلر واردر كه جمع اولوب الفت ايتمكه قومازلر باب سابع عشر زراعتلرى بياننده در مصنف ايدر يوزكون مقدارى ولايت چينك ايچنده كتدك طاغ و صحراسنى بالتمام زراعت ايدوب طاشلق و قوملق اولان محللره بله عربه‌لر ايله طوپراق كتوروب زراعت ايتمشلر خلاصه بر قارش بر زراعتدن خالى كورمدك و اول ولايتده چارپالرى صحرايه چقارميوب خانه‌لرنده بسلرلر و ايكى اوج اى مقدارى كتديكمز يوللرك ايكى جانبنده متصل اغاجلر دكمشلرانلرك سايه سنده يورييوب اصلا اوزريمزه كونش طوقونمدى و جميع ممالك چينك زراعتى يغمور ايله در اكر يغمور ياغمسه قحط اولور و قحط اولدقده خاقاندن علاج ايليك ديو امر و اراده وارد اولور و علاجلرى بودر كه هر كشى زاد و زواده سندن كندويه كفايت مقدارى بر ايلغنى اليقويوب باقيسن خلقه بيع ايدرلر اكر بركمسه بر كونلك زياده اليقورسه قتله