اول قسمده يول اوزرنده واقع اولمشدر و اطرافنده اولان شهرلر بيحد و بيپاياندر و هر شهرده مصر جامع واردر ادنى شهرى تبريز كبيدر ايكنجى قسمنه نزارستان ديرلر وانده عجايب چينىلر و طبقلر و التون و كمش و يرنجدن غرائب طاسلر و صحنلر و تيسيلر و صراحيلر اوانى بينلر ايدرلر كه كورنلر حيران اولورلر و بو قسمك بر مشهور شهرى نمطايدر كه پاى تخت ملك چيندر فغفور چين و خاقانان اقدمين و سهنشاهان پيشينه پاى تخت اول شهر ايدى و شهر مذكوره‌يه چارپا حيوان كيرمز يوكلرينى عربه‌لره بوكلدوب پياده ادملر و اول شهرده فغفور چين و خواقين پيشينك تاج و تختلرى عادت اوزره يرلرنده طورر و هر صباح اول شهرده اولان امرا و اعيان اسلوب سابق اوزره اول تختك اطرافنده جمع اولوب طوررلر اكر بركون ترك ايتسه‌لر جمله‌سى كنهكار اولوب امراسى معزول و سائر كبراسى كيمى قتل و كيمى حبس اولنورلر و حالا پاى تخت اولان خانبالغ تاريخ هجرنك سكزيوز قرقنده بنا اولمشدر و انشاسنه سبب بودر كه دشمنلرى اولان قلماق طائفه سنك اول محل كذركاهلرى اولمغله انلرى منع و دفع ايچون خانبالغى بنا و پاى تخت ايتمشلردر زيرا اهل چين كمسيه تعصب ايدوب ضرر قصد ايتمزلر همان حكمت اوزره بلده‌لرين حفظ و ضبط ايتمكه اجتهاد ايدرلر اوچنجى قسم ممالك خطايدن خانبالغدر و مذكور شهرك ايچنده طرف شماليسنده برارماق واردر كه ايكى ميل مقدارى طول و عرضى واردر اهل چين اول نهرى قعرندن هندسه ايله شويله قازمشلردر كه اندن اوتوز دكرمن يوريديرلر و بر رودخانه تحصيل ايدوب خاقان چينك اول يدى حصارده اولان سرايلرينه و اطرافلرنده اولان خانه‌لرينه كيروب بعده خانبالغدن چقوب جوانبنده اولان باغ و بوستانلرى صواردقد نصكره اطراف مملكتده روان اولور و خانبالغ لفظ غوريدر اهل چين لساننده ادى دبو دركه پاى تخت ديمك اولور و اول مملكتك متاعى كمشدر و چينده معدن سيم اول مرتبه ده كثرت اوزره دركه اكر ممالك ربع مسكونده كمش حاصل اولمسه خطا معدنلرنده اولان كموشك ربعى كفايت ايدر ايدى و ممالك چينده ذكر اولنان معدنلر و امتعه و قماشلرك كثرتى خانبالغده در و مذكور معدنلرك و متاعلرك اصلى خانبالغه قريب دى تنك نام بر شهرده در و اودون يرينه طاش يقارلر ديدكلرى شهر خانبالغدر كه زنجبيل و ماميران چينى و كبابهء چينى و سائر ممالك انتسابى اولان ادويه‌لر