صباح اولدقده خلق تماشايه چيقوب بو حالنلرى مشاهده ايتدكلره جميع خلقه خوف وحشيت كله‌رك اكثر ناس فعل فساددن رجوع و فراغت ايدوب تضرع و زارييه مائل اولملريله باذن الله تعالى وقت اسوده اولدى و نقل اولنور كه كلجك قتل زماننده اول سنه نك عشرى مقدارى ادم هلاك اولمدى و عجيبلرى بودر كه بوقدر بيك هلاك اولان ادمينك باشلرينى بشقه بشقه صندوقلره قويوب و اول كمسه‌نك كندى و بدرنيك اسم و سمتى و شهر و محله سنى و كناهنى و قاج سنه حبسده اولديغنى و هرايده قنغى ديوانخانه تفتيش اولنوب هرييلده خان چين اوكنده نه نوع كناه ايتديكنى اعتراف و اقرارى يازيلوب حجت اولديغنى او صندوقچه‌لره قويوب اوتوزييله دكين حفظ ايدرلر شايد كه اول مقتوللرك تعلقاتندن بر كمسنه كلوب بنم بابام و يا اوغلوم و يا برادرم و يا اقربامدن بريسى ناحق يره قتل اولنمش ديو دعوا ايدر ايسه اولوقت خاقانك امريله اول مقتولك باشنى بولوب حجت مرقومه ايله كناهنى اثبات و مدعيلرى الزام ايدرلر و جميع خلق اول كمسه نك بيكناه قتل اولمديغنى بلورلر بعده اول باشلرى خزينه دن اخراج ايدوب دريايه القا ايدرلر خطانك بو مقوله عجايب و غرايبى محال بياندر و اوج سنه ده بر محبوس اولنلردن زندانى بوشالدوب قتل لازمكلانى قتل و اطلاق لازمكلانى اطلاق و جريمه و يرمكه قدرتى اولميانلرى مقدارنجه خدمت ميريده استخدام و بعضيلرى كناهلرينه كوره چارسولرده و يول باشلرنده و دربندلرده خلقه موجب عبرت اولمغيچون شكنجه‌لر و غريب عقوبتلر ايدرلر باب ثامن اهل خطانك سنه ده نوجهله عيد ايتدكلرى بياننده در اهالئ چين ييلده بر كره فصل شتانك نهايتنده عربيده ييل باشى محرم اولديغى كبى انلرك دخى ييل باشى و ماللرينك تحصيل حسابى اولزمانده تمام اولمغله تمام ممالك چين خلقى عيد ايدوب براى مقدار كيجه و كوندز سوز و ساز ايله متصل عيش و نوش و صحبته مشغول اولورلر و خاقان چين ايوان سرايده بر عالى صفه اوستنده تجمل تمام ايله التوندن بر مزين تخت اوزرينه اوتوروب جميع وزرا و امرايه حضور خاقانه حاضر اولمغه اجازت اولور بوقدر بيك پيكلر و بكلر رنكارنك اطلس خطاييلر ايله مزين واراسته بعضيلرى اصفر و كيمى احمر و كيمى زيتونى و كيمى الماسى و سائر الوانله كروه كروه قاعده‌لرى اوزره برى برينك ياننده اوتوروب اطراف عالمدن كلان الچيان و سائر معزز و محترم اولان خلايقه دخى اجازت و فرمان اوله رق اول ديوان ثريا مكانه حاضر اولورلر