الشيخ اسماعيل حقي البروسوي
فهرست 48
تفسير روح البيان
از فرو كبريت احمر قدس سره الأطهر رحمت واسعهسى حسبيله ديمشدر - بزم قيامتده شفاعتمز بزى انكار ايدنلرهدر - يعنى بزى اقرار ايدنلر شفاعته محتاج اولميوب يالكز عفو وغفران دكل بلكه نيجه فضل وإحسانه دخى مظهر اولورلر . زيرا أو مقولة مظاهر كليهيى اقرار ايتمك اقرار حق وانكاردخى انكار حقدر . وحق كندينى اقرار ايدنه عذاب ايتمز مكركه إقراري بعض انكار ايله مخلوط وتوحيدي شركله مزدوج أوله . وبوفقير حضرت شيخك توصيه سيله انتقالند نصكره دامادلرى اولوب مناسبت معنوية دنصكره مصاهرت صورية دخى واقع اولمشدر . نتكم فخر عالم صلى اللّه عليه وسلم بيورمشلردركه - يا رب هر كيمكله كه مصاهرت ايتدم وهركيمكه بنمله مصاهرت ايتدى مغفرت ايله - يعنى امتنك آل رسول ايله شرف مصاهرتنه أشارت ايلر . زيرا أسباب مغفرتدن برى دخى اودر . وبوندن حضرت صديق وفاروقك خصوص حالنه . وحضرت ذي النورين ومرتضانك شرف وكمالنه رمزوادر . زيرا كريمهء صديق عائشة ودختر فاروق حفصة عقد رسولده واقع اولمشدر . وكذلك رقيه وأم كلثوم ذو النورينه وحضرت فاطمهيى مرتضايه تزويج ايتمشلردر رضى اللّه تعالى عنهم . وبو سر سابق زمان لاحقده دخى جارى اولوب قالمشدر . ولكن سر وصورتي جمع ايتمك نادر واقع اولور « فكن على بصيرة من الأمر وارتبط بصورة النبي وسره قبل نفاد العمر » : بعد ذا بوفقيرك ولادتي [ بيك التمش اوچ ] ذي القعدة سى اوائلنده يوم أحدده واقع اولمشدر كه [ حالا بيك يوز اوتوزيدى ] ده در وسال عمر [ يتمش بشه ] بالغ أو لمشدر . ووقت وفات دخى تعريف الاهى ايله متعين اولندى قياس اولنور . ولكن سترى واجب واخفاسى لازم أو لأن اموردندر . واكا متعلق بعض نظم بطريق الرمز غيرى محلده يازلمشدر . اى مؤمن بوجمله تحرير اولنان حاشا تمدح طريقيله دكلدر . هله كه اوليانك نفسي اظهار وهم سلسله سنه ارتباطه تحريضدر همان حسن ظن اوزرينه اولوب - سلسله نامه مزده درج اولنان كلمات عاليه ايله عامل أوله سن . وشيخمدن مسمو عمدركه بن حضرت علىيه ايريشنجه اوتوز برنجىيم بيورمش أيدي بوفقير دخى كلب أصحاب كهف سكزنجى اولديغى كبى بو سلسلهء طريقت جلوتيه نك اوتوز ايكنجى سى اولمشاولور فاعلم ذلك واقبل كلبرى بو خلقه يه بند ايله كندك دردمند * أوله كور زنجير عشق حضرت مولايه بند عشقدر منصورى بر دار ايلين بو دارده * سندخى آل بوينكه عشق الاهيدن كمند هرندكلوا دور اولورسه منزل وصل خدا * وارايسه جنبش دل وجانكده دور مه سور سمند شول ارنلرباغنه كيرميوه جين أول اى كوكل * مصر معنايه ايريش اولدك ايسه حوباى قند جام عشقى جلوتى بزمنده ايچدك حقيا * آنك ايچون ذوق حالك اولدى غايت دلپند